[ 店主極推 - 現貨 ] The Tool Lab 粉撲 ( 適合所有膚質 )

呢個粉撲係我用過咁多粉撲入面質地最特別嘅一款!! 攞深啡色同淺啡色為例，呢兩個顏色佢雖然薄，但係完全唔輸厚氣墊出黎嘅效果，同佢形容嘅完妝感係一模一樣，深啡色拍出黎嘅妝感係比較水潤光澤嘅，適合一啲保濕小小嘅粉底! 乾肌人士應該會鍾意呢粒! 而淺啡色就係適合一啲比較持妝小小或者控油霧面粉底，油性肌膚應該會鍾意淺啡色呢粒!!! 我自己用落都覺得真係會控油啲同持妝啲～遮瑕力亦都唔會降低。

至於綠色同奶油白色點解我會拎黎講就係因為佢兩款都係比較厚嘅! 同前面兩隻顏色唔同~ 奶油白色係比較厚實偏硬嘅材質，適合一啲需要高遮瑕力嘅粉底! 呢個奶油白色我一開始唔係好get到佢點用㗎其實 但後尾發現佢勁嘅位就係佢可以唔係再回沾粉底都做到二次遮瑕效果，意思姐係佢呢個只需要拍咗一次粉底上面，你同一個位置無論再拍上面第二次、第三次、第四次都好，佢只會不斷增加你嘅遮瑕力，並唔會因為拍多幾次而整走你嘅底妝，降低遮瑕力，而且佢都可以做到令你嘅底妝貼合你皮膚～所以需要遮瑕力嘅人士請閉眼入呢款奶油白色! 最後就係綠色啦，綠色呢粒係同韓國化妝師 Happyrim 一齊研發嘅，之前已經係 Happyrim 嘅影片入面見過好多次，至於都上架TT，佢係濕水之後會漲大的，適合超級保濕同光澤型粉底，因為佢出黎嘅妝感會係好保濕，好有光澤感，比深啡色更加保濕同有光澤! 超級乾肌可以試下佢~ 或者熱愛水光肌，奶油肌嘅人士都可以! 呢粒係軟淋淋咁嘅海綿🧽同埋呢粒有個優點就係佢濕水後比其他大好多!!!! 上妝會好方便快好多~

至於尺寸regular同round就只不過係一個橢圓形同一個圓形嘅分別 我覺得除非你面真係好大 如果唔係圓形就夠用 因為可以擺入cushion入面🦭regular係唔得㗎🤣🤣🪄

🪿總結一下先：

深啡色 - 適合光澤水潤粉底 出黎效果會比較有光澤感
淺啡色 - 適合霧面啲 乾爽型粉底 出黎效果比較乾爽控油
奶油白色 - 適合高遮瑕力粉底 出黎效果好自然但高遮瑕力 同一位置再拍多幾次只會令遮瑕力越黎越高 反而唔會降低遮瑕力 我幾鍾意呢粒！好特別 係其他粉撲做唔到嘅

[ NEW] 綠色 - 適合超級乾肌和光澤型保濕粉底 出黎效果係四款入面最有光澤感同埋最保濕嘅 同埋材質係適合敏感肌適用的

四款都係好持妝！所以只需要跟返你自己想要嘅妝效買就ok
如果想三隻一齊買當然都冇問題（我就係咁😇）